Scott Dann og miðvarðastaðan

Svo virðist sem að Birmingham City stefni í gjaldþrot, skelfilegar fréttir fyrir félagið og stuðningsmenn þess, en gæti verið gullið tækifæri fyrir Liverpool að krækja í miðvörðinn Scott Dann. Liverpool er talið hafa haft áhuga á leikmanninum í nokkurn tima en þar sem Birmingham hefur farið fram á of hátt verð þá virðist sem Liverpool hafi ákveðið að horfa annað eða eitthvað á þá leið.

Það gæti hins vegar verið að núna muni Liverpool láta til skarar skríða og leggja fram tilboð í Dann þar sem að staða Birmingham er þannig að erfitt gæti verið fyrir þá að hafna tilboðum í leikmanninn þessa stundina. Ég mun allavega vona það að Liverpool freisti þess að fá þennan stuðningsmann Liverpool í sínar raðir.

Liverpool er með mjög marga miðveði í sínum röðum, jafnvel of marga ef við lítum á það þannig. Við erum með fjóra aðalliðsmiðverði í þeim Daniel Agger, Martin Skrtel, Jamie Carragher og Sotiris Kyrgiakos, og svo erum við með þrjá mjög efnilega miðverði í liðinu Danny Wilson, Andre Wisdom og Daniel Ayala. Það er því nokkuð augljóst að við erum vel mannaðir í þessari stöðu en það mætti alltaf bæta í gæðin í hópnum og það myndi Dann klárlega gera.

Við sáum það nokkuð augljóslega að Liverpool vill styrkja vörnina og félagið virðist vera tilbúið að ganga langt í leit sinni að réttu leikmönnunum til að styrkja varnarlínu sína. Í janúar heyrðust orðrómar um að félagið hafi boðið allt að 20 milljónir punda í Micah Richards, leikmann Manchester City, og áður en Phil Jones gekk til liðs við Manchester United frá Blackburn þá var Liverpool tilbúið að greiða allt að 16-20 milljónir punda fyrir þann strák og hann er aðeins nítján ára. Þannig það er áhugi á að fá miðvörð til liðsins og er ég alveg viðbúinn því að einn miðvörður komi til félagsins í sumar og er Dann mjög líklegur kostur.

Það þarf líklega að rýma aðeins til í miðvarðarhópnum og gæti ég vel séð Wilson og Ayala fara á lán til annars liðs til að næla sér í mikilvægar mínútur í reynslubankann og ég gæti vel trúað því að félagið sé tilbúið að skoða tilboð í Daniel Agger og Sotiris Kyrgiakos. Ég held að meiðslasaga Daniel Agger gæti þýtt að hann sé líklegur til að halda út um dyrnar til að rýma menn af launaskrá og aldur Kyrgiakos er líklega eitthvað sem félagið tekur inn í reikninginn ef tilboð í hann berst félaginu. Ég held að Martin Skrtel og Jamie Carragher séu nokkuð öruggir á að vera áfram hjá félaginu, það þarf ekki að útskýra þetta með Carragher en Skrtel held ég að sé mikils metinn á Anfield og efitr að hafa spilað vel undir lok síðustu leiktíðar þá held ég að það gæti þurft frekar stórt tilboð til að Liverpool væri til í að selja.

Þar sem Dann þykir mjög líklegur þessa stundina þá verð ég að viðurkenna það að mér litist ágætlega á hann sem leikmann Liverpool. Hann er stór og sterkur, harður í tæklingunum og sterkur í skallaeinvígum. Hann er agaður og traustur í leik sínum. Hann hefur tiltölulegan hraða í sínum leik, hann leynir alveg töluvert á sér á því sviði, og hann er ágætis spilari – hann er engin Daniel Agger þegar kemur að því að spila boltanum en hann er yfir „meðallagi“ á þessu sviði. Fyrir nokkrum vikum var talað um að Birmingham vildi fá hátt í 10 milljónir punda fyrir hann, jafnvel meira, en í kjölfari fregna af gjaldþroti Birmingham þá vonandi lækkar verðmiðinn á honum töluvert en baráttan um leikmanninn mun vera mikil og því gæti komið smá stríð milli félaga sem vilja fá hann í sínar raðir en þar sem hann er Scouse, stuðningsmaður Liverpool og fyrrum ársmiðahafi á Anfield þá verður það að segjast að Liverpool hefur stóran ás upp í erminni í þessari baráttu.

„Frí“ frá Evrópu og áhrif þess á Liverpool

Fyrir nokkrum vikum síðan var eitt aðal umræðuefnið á meðal stuðningsmanna Liverpool hvort hentugara væri fyrir liðið að enda í 5. eða 6.sæti í deildinni, ef það hefði hafnað í því fimmta þá hefði það þýtt að félagið væri gjaldgengt í Evrópudeildina á komandi leiktíð en það sjötta þýddi að í fyrsta skiptið í langan tíma væri félagið ekki í Evrópukeppni tímabilið eftir. Liðið hafnaði í sjötta sætinu og verður því mjög skrítið að hafa enga Evrópukeppni hjá liðinu á næstu leiktíð og vonandi ekki eitthvað sem maður þarf að fara að venja sig á!

Menn komu með hin ýmsu rök fyrir því af hverju þeir voru með eða á móti því að spila í Evrópudeildinni á komandi leiktíð. Allt hefur líklega sína kosti og galla, ég hef verið að velta þessu svolítið fyrir mér núna í smá tíma og langar að reyna að sjá hvaða áhrif og afleiðingar þetta „frí“ frá Evrópukeppnum gætu haft á Liverpool. (Þetta gæti auðvitað verið mjög persónubundið og þetta er bara eins og ég sé hlutina)

Kostirnir við að vera ekki í Evrópukeppni á næstu leiktíð eru eflaust nokkrir en helsti kosturinn er klárlega sá að leikjaálagið á liðið minnkar, minna um ferðalög í miðjum vikum og allir leikir sem við komum til með að spila eru innanlands. Það er því ekki eins og liðið snúi aftur eftir að hafa spilað erfiðan útileik í Austur-Evrópu á fimmtudagskvöldi og spili erfiðan útileik á t.d. Brittania tveimur eða þremur dögum seinna. Það er vissulega kostur að geta „einblínt“ á árangur í deildinni, hvort sem það væri í formi titilbaráttu, Englandsmeistaratitils eða Meistaradeildarsæti. Það er allavega engin afsökun að leikjaálag eða óhagstæð niðurröðun leikja afsaki slæmt gengi í deildinni, engin Evrópukeppni og þá vil ég fara fram á góðan árangur í deildinni enda svo sem eina keppnin sem við þurfum að sýna hvað mestan metnaðinn í.

Það er kannski erfitt að telja upp kosti þess að Liverpool sé ekki í Evrópukeppni þetta árið, hvort svo sem hún heitir Evrópudeildin eða Meistaradeildin. Að telja upp ókosti og slæmar afleiðingar er frekar auðveldara að mínu mati enda var ég hlynntari því að ná þessu Evrópusæti en ekki.

Á síðustu leiktíð í Evrópudeildinni, sem mér fannst Liverpool svo sem aldrei leggja neinn brjálæðislegan metnað í að vinna, fengu varamenn og yngri leikmenn liðsins mikilvægar og góðar mínútur sem komu þeim í betra leikform eða fór í reynsluboltann og nýttist leikmönnunum og liðinu svo seinna meir. Martin Kelly, Jonjo Shelvey, Jay Spearing, Danny Wilson, David Ngog og fleiri ungir strákar fengu mikilvægar mínútur í keppninni og sýndu ágætis takta í henni og virtust vaxa og dafna í kjölfarið. Frábært ef við getum gefið yngri leikmönnum mikilvægar mínútur í reynslubankann með minna „mikilvægum“ leikjum. Stór ókostur.

Að keppa ekki í Evrópukeppni þýðir það að Liverpool hefur um einum minni bikar að keppa um þetta árið og að Liverpool skuli keppa um Evrópubikara er svo stór partur af sögu og stolti félagsins, þarna er mjög stór hluti af Liverpool ekki til staðar. Maður vill auðvitað sjá Liverpool spila og keppast um sigur í Meistaradeildinni en sé það ekki í boði þá eigum við að vera í Evrópudeildinni, það er bara þannig að Liverpool á heima í keppnum með stærstu og bestu félagsliðum Evrópu – þetta er eitthvað sem verður að laga á næstu leiktíð. Að geta komist í Meistaradeildina að ári liðnu yrði mjög vel þegið og þar sem liðið spilar ekki í Evrópukeppnum núna þá eiga þeir að ná góðri lokastöðu í einu keppninni sem þarf að leggja mest á sig í.

Ef að við erum að keppa við önnur lið um leikmenn á meginlandi Evrópu þá stöndum við ekki endilega svo vel að vígi að mörgu leytinu til því margir leikmenn utan Englands vilja aðallega fara til liða í Meistaradeildinni og þar sem það eru fjögur önnur lið úr sömu deild og Liverpool sem hafa upp á það að bjóða þá er kannski óhætt að viðurkenna það að í augnablikinu gæti Liverpool ekki verið jafn „álitlegur“ kostur fyrir þá enda ekki hægt að bjóða upp á neina Evrópukeppni þetta árið. Kannski má líta svo á það þannig að Liverpool sé að smeygja sér frá nokkrum byssukúlum með því að þessir leikmenn velji Meistaradeildina fram yfir Liverpool, þetta eru þá alveg örugglega ekki leikmennirnir sem vilja fara til Liverpool til þess að koma þeim aftur á toppinn heldur vilja þeir aðeins fara til liða sem eru nú þegar á toppnum. Okkur tókst að fá Suarez án þess að geta bókað Evrópusæti að ári, við höldum enn leikmönnum eins og Reina, Gerrard og fleirum sem eiga að spila í Meistaradeildinni á hverju ári svo það er klárt mál að metnaður félagsins liggur hátt og menn séu tilbúnir að leggja sitt að mörkum til að það náist. Það er því kannski ekki svo slæmt að „missa“ af svona leikmönnum, það gæti einmitt verið ástæðan fyrir því að Liverpool virðist horfa svona mikið til Englands núna í leit sinni að mögulegum leikmannakaupum því þar eru leikmenn sem vilja líklegra frekar koma til Liverpool með „rétta“ hugarfarið.

Það að Liverpool sé ekki í Evrópukeppnum er slæmt að mörgu leyti en þar sem að ný lög um rekstur og fjárhag félagsliða í Evrópu eru að fara að taka gildi fljótlega þar sem tekjur félagana skipta öllu máli þá er mjög slæmt að liðið skuli ekki geta keppt í Evrópukeppnum á þessum tímapunkti. Tekjur þess að spila í slíkum keppnum geta verið mjög miklar fyrir félögin. Þau eru að fara að spila fleiri leiki sem þýðir meiri pening í gegnum miðasölu á leikjum, aukinn peningur vegna sjónvarpsréttar á leikjunum og svo er auðvitað verðlaunafé eftir því sem liðin ná lengra í þessum keppnum. Að vera í Meistaradeildinni skilar auðvitað meiri pening í kassann en peningurinn sem kemur úr hinni keppninni er alltaf vel þeginn og sérstaklega á tímum sem þessum.

Ég vil sjá Liverpool komast strax aftur í Evrópukeppni eftir næsta tímabil og þá auðvitað helsta í Meistaradeildina. Að Liverpool spili ekki leiki í miðri viku í Evrópukeppni, að við fáum ekki Evrópukvöldin frægu á Anfield, einum færri titill til að berjast um og auðvitað verða færri Liverpool leikir sem við getum horft á í vetur – svo í guðanna bænum Liverpool, komið ykkur nú aftur í keppni þeirra bestu!

Þjálfara- og leikmannamál

Á síðustu dögum virðast hreyfingar Liverpool á leikmannamarkaðnum vera engar! Fyrir slúðurþyrsta einstaklinga eins og mig þá er þetta mikil andleg barátta. Ég renni yfir Twitter og sé ekki neitt, fer á slúðursíðuna á Facebook og sé að ég hef ekki misst af neinu merkilegu, ég skoða allar hugsanlegar Liverpool/fótboltasíður og enn ekki neitt. Mér finnst stundum eins og ég sé að leita að einhverju sem er bara ekki til.

Það eina sem við virðumst frétta af slúðri tengdum leikmönnum sem hafa verið sterklega orðaðir við Liverpool undanfarið er að þeir virðast margir hverjir vera á leiðinni eða jafnvel farnir annað. Connor Wickham, ungi framherjinn sem var sterklega orðaður við Liverpool, er nú farinn til Sunderland fyrir einhverjar 8-13 milljónir punda. Persónulega hefði ég mjög mikið vilja fá hann til Liverpool enda gífurlega mikið efni þar á ferðinni, hins vegar þá spyr maður sig hvort hann hafi verið það ofarlega á óskalistanum hjá Liverpool því það virtist ekki líta út þannig að Liverpool hafi barist með kjafti og klóm við að klófesta hann því ég held að við ættum ekki í neinum vandræðum með að yfirbjóða þetta kaupverð ef okkur hefði langað til þess.

Svo virðist sem að Gael Clichy sé á leiðinni til Manchester City frá Arsenal, þá virðist sem að enn eitt skotmark Liverpool virðist vera að renna þeim úr greipum. Í kjölfarið þá mun Arsenal líklega þrýsta harðar á að landa Jose Enrique, öðru skotmarki Liverpool í sumar, og sömuleiðis ef þeir missa Cesc Fabregas eða Samir Nasri úr sínum röðum þá er ekki ólíklegt að þeir muni leggja mikinn metnað í að fá Juan Mata, öðru meinntu skotmarki Liverpool, í sínar raðir. Svo þarf maður vart að nefna það að Liverpool hafði verr í baráttunni við Manchester United um kaup á Phil Jones og Ashley Young.

Eina sem virðist vera í gangi ef að það er hægt að segja það eru meinntar viðræður Liverpool vegna kaupa á Charlie Adam og Stewart Downing. Þeir virðast vera hvað efstir á óskalista Liverpool þessa stundina og virðist sem Liverpool sé tilbúið að láta eftir í baráttunni um aðra leikmenn til þess að geta klárað kaupin á þessum tveimur leikmönnum.

Við vitum bara ekkert hvað er í gangi hjá Liverpool þessa dagana, það virðist nefnilega enginn gera, og það er allt örugglega samkvæmt planinu hjá félaginu. Þetta slúður sem hefur verið að ganga hvað mest um net- og fjölmiðla virðist vera til þess að önnur lið spýta í lófana til að missa skotmörk sín ekki til Liverpool. Ég hef verið að spá í því hvort þetta sé allt hluti af planinu hjá Liverpool, að senda út og gefa í skyn í gegnum fjölmiðla að þeir hafi áhuga á hinum og þessum til þess eins og ýta samkeppni sína á þá leikmenn í þeirri von um að baráttan um raunveruleg skotmörk minnkar. Þetta myndi ég alls ekki útiloka og þetta er að mig minnir eitthvað sem að þeir hjá Boston Red Sox gera svolítið mikið af – þeir eru víst alveg mjög „sneaky“ á leikmannamarkaðnum í Major League hafnaboltanum.

Tökum bara vinstri bakvarðarstöðuna sem dæmi. Liverpool vantar vinstri bakvörð, City þurftu (að mínu mati) að fá betri mann í þá stöðu, Arsenal að missa sinn besta mann í þessa stöðu og því alls ekki ólíklegt að liðin berjast um 3-4 sömu leikmennina. Í þessu tilfelli held ég að menn eins og Gael Clichy, Aly Cissokho, Leighton Baines og Jose Enrique hafi allir verið undir smásjá þessara liða (nema auðvitað Clichy og Arsenal!). Ef við gefum okkur það að Cissokho og Baines eru kannski helstu skotmörk Liverpool í sumar þá er það alveg frábært ef hægt væri að beina City og Arsenal að hinum leikmönnunum og koma þeim úr baráttunni um þá sem við viljum hvað mest. Ef þetta er eitthvða á þessa leið þá er það mjög svo sniðugt finnst mér.

Ég held að Liverpool lumi á ýmsu óvæntu fyrir okkur í sumar og við verðum bara að sýna þolinmæði, sem er auðvitað hægara sagt en gert!

Eina hreyfingin sem virðist vera á leikmannamálum hjá Liverpool þessa dagana er að búið er að semja við þrjá mjög efnilega stráka sem voru að fá sinn fyrsta atvinnumannasamninginn hjá félaginu. Umræddir leikmenn; Tyrell Belford, Stephen Sama og Adam Morgan sem hafa allir farið mikinn með unglingaliðunum og eru mikil efni sem væntanlega eru bundnar miklar vonir við í framtíðinni. Frábært að sjá að Akademían sé að skila af sér efnilegum og góðum leikmönnum. Svo er eitthvað talað um lánssamning Peter Gulacsi til Hull og að Alexander Doni gæti komið í kjölfarið frá Roma til Liverpool. Gríska varnartröllið Sotirios Kyrgiakos virðist hafa unnið sér inn ársframlengingu á samningi sínum og verð ég að viðurkenna að ég er alveg nokkuð sáttur með það. Hann hefur yfirleitt alltaf staðið sig vel, virðist vera með gott hugarfar á vellinum og æfingasvæðinu og virðist njóta mikillar virðingu samherja sinna – ég veit allavega fyrir víst að ég myndi ekki þora að sýna þessum manni óvirðingu!

Sammy Lee hefur svo yfirgefið Liverpool eftir að hafa verið aðstoðarstjóri Rafa Benitez, Roy Hodgson og Kenny Dalglish síðan árið 2008. Ég veit náttúrulega ekkert um það hvort að Sammy hafi ekki þótt standa sig í starfinu, vilji fara annað eða hvað það nú er en það hljóta allir stuðningsmenn Liverpool að kveðja Sammy með söknuði og virðinu enda framlag hans til félagsins sem leikmaður á gullaldarárunum og sem þjálfari eða aðstoðarstjóri á erfiðum tímum, alveg ómetanlegt.

Það liggur alveg augum uppi, finnt mér, að Steve Clarke verður núna opinberlega hægri hönd Kenny Dalglish og mun nýr þjálfari koma inn í þjálfarateymið, mögulega fleiri en einn. Þeir sem eru helst nefndir til sögunnar eru gamla Liverpool-kempan Gary McAllister sem örugglega allir stuðningsmenn Liverpool yrðu mjög glaðir að sjá aftur í félaginu enda nýtur hann gífurlegrar virðingu stuðningsmanna og leikmanna liðsins, Kevin Keen sem yfirgaf West Ham fyrir skömmu eftir að hann fékk ekki stjórastöðuna þar á bænum eftir að Avram Grant var rekinn er einnig talinn líklegur ásamt Paul Clement, aðstoðar-aðalliðsþjálfara Chelsea en hann þekkir vel til Steve Clarke. Svo heyrði ég nafn Karl Robinson nefnt í tengslum við þessa stöðu en hann er knattspyrnustjóri Milton Keynes Dons í 2.deild.

Nú er búið að opna leikmannamarkaðinn í Evrópu og nú er ekkert að vanbúnaði fyrir Liverpool að láta hjólin rúlla. Henderson er kominn, sem er frábært, en nú þarf að fara að klára fleiri kaup og sölur. Vonandi mun eitthvað gerast í þessum málum eftir helgi, ég allavega get ekki beðið lengur. Það eru tveir mánuðir eftir af leikmannamarkaðnum og ég er strax að verða uppgefinn – ég er alveg viss um að þetta verði minn bani!